Hvernig væri að klára Reykjanesbrautina fyrst.

Umræða um lestarsamgöngur við Keflavíkurflugvöll er ekki ný.  Þetta hefur  verið skoðað áður og alltaf með sömu niðurstöðu.  Þetta er alltof dýrt og ekki nægilegur fólksfjöldi sem myndi nýta þetta til að hagkvæmni náist.  Sem sagt dauðadæmt.  Uppbygging lestarkerfis er ákaflega dýr og t.d. er það nánast að ríða Kaupmannahöfn að fullu að koma slíku kerfi á, þar sem fólksfjöldinn er miklu meiri en hér á suðvestur horninu.

Væri ekki nær að ljúka við það sem við höfum þegar ákveðið og er fyrirséð að dugar næstu áratugina.  Þar  er átt við tvöföldun Reykjanesbrautar, sem hófst fyrir rúmum 10 árum og er enn hálfklárað verk.  Enn er eftir að ljúka þeirri framkvæmd til beggja enda, þ.e. frá Hvassahrauni, gegnum Hafnarfjörð og til Reykjavíkur, en einnig frá Fitjum upp að flugstöð Leifs Eiríkssonar, ásamt tenginum við Reykjanesbæ. Þessu til viðbótar er eftir að ganga frá öryggisþáttum vegarins, svo sem vegriðum milli akreina, ljósastaurum, upplýsingaskiltum og eftirliti.

Ef þetta væri klárað, mætti auka hámarkshraðann á Reykjanesbraut í 120 og jafnvel 130 km/klst. og þar með væri ferðatíminn milli Reykjavíkur og flugstöðvarinnar kominn niður í c.a. 20 mínútur.  Ferð frá t.d. Mjóddinni sem er nálægt miðpunkti höfuðborgarsvæðisins og til Reykjanesbæjar væri þá komin í 15 mínútur eða svo.   Umferðarmagnið á þessari leið í dag eru uþb. 10.000 bílar á sólahring að meðaltali.  Fullkláruð Reykjanesbraut mun auðveldlega anna 60.000 bílum.

Mun nær væri að rafvæða almenninssamgöngur á þessari leið, sem og flugrútuna, heldur en að fara í rándýra lestarframkvæmd, sem aldrei mun borga sig og miðað við fyrri reynslu, sennilega seint verða klárað svo viðhlýtandi sé.  Þess utan, höfum við Íslendingar enga reynslu af rekstri lestarkerfa og eigum fullt í fangi með vegakerfið, þannig að ég held að það sé ekki gott ráð að auka á það flækustig.

Með öðrum orðum, þá held ég að þetta sé ekki tímabært og nær að klára það sem við höfum þegar ákveðið og byrjað á.  Síðan má skoða aðra kosti, en það er eki mál málanna núna.

Borgin skoðar háhraðalest

Athugasemdir

[Grímur (IP-tala skráð) 29.11.2013 kl. 12:16]

Hjartanlega sammála

Ótrúlegt hvað hægt er að sólunda fjármunum í að skoða þetta og sporvagna, aftur og aftur og aftur...............................

Minnir mig alltaf á loftbílinn sem  margoft var kannaður - þrýstiloft í kút á stærð við rútu nægði til að aka meðalbíl frá Reykjavík til Keflavíkur, en samt þurft að kanna málið

[Ragnar Torfi (IP-tala skráð) 29.11.2013 kl. 12:46]

Sammála.

Þegar farið er í örstutta leit á netinu má komast að því að kostnaður við lagningu alvöru lestarkerfis getur kostað yfir 10 milljónir USD á kílómetra. Kerfið í Frakklandi kostaði yfir 15 milljónir USD á kílómetra sem gerir rúma 1,7 milljarð króna á kílómetrann.

Tölur sem finna má á netinu ásamt upplýsingum um hversu mikið yfir áætlun lagning kerfanna kostaði, eru frá þjóðum með hefð fyrir lestum, þekkingu á þeim og iðnaði til að byggja á.

Hér höfum við ekki þekkinguna né stál- eða farartækaiðnað. Veit ekki með peningana, en kannski eru 80 milljarðar einhvers staðar í geymslu sem ég veit ekki um.

Betra er að tvöfalda veginn alla leið. Kaupa svo flotta langferðabíla sem auðvelt sé að taka farangur með sér inn í. Það má örugglega kaupa marga áður er break-even punkti er náð í kostnaði. Það mætti niðurgreiða farið með þeim.